nýr titill

2009-02-04T23:02:00.000+01:00

Hér kemur bráðum ný færsla.

2008-05-08T19:42:00.003+02:00

Spáin fyrir helgina

Held barasta að sumarið sé komið! og ég inni að skrifa ritgerð :)

æ það er ekki svo slæmt, þetta er alveg að verða búið, erum líka búin að grilla nokkrum sinnum, svo ég get ekki kvartað.

kveðja
Kiddi

2008-02-27T19:34:00.002+01:00

Er ekki kominn tími á nýja færslu?

Kominn ansi langur tími síðan eitthvað nýtt kom hérna. Ýmislegt hefur þó gerst síðan. Var að fá fyrir sirka viku síðan prófskjalið frá HR og get því farið að kalla mig Tæknifræðing :) Í gær tók ég svo loks tvö próf frá haustönninni, munnleg próf bæði tvö og ekki létt en það hafðist þó. Þá er bara frammundan að klára þetta verkefni sem við erum að vinna að, þá verður loks lokið skólagöngu minni að sinni.

Annars var það ekkert sérstakt.

kveðja

Kiddi

2007-10-08T16:20:00.000+02:00

Hjólað í skólann

Fór í skólann á laugardaginn og tók nokkrar myndir á leiðinni.

Hjólageymslan fyrir utan húsið mitt
Svona lítur Limfjordskollegíið út.Svo þarf ég að hjóla upp rosalega bratta brekku.

Hérna er ég kominn upp brekkuna, þurfti að stoppa og kasta mæðinni og taka mynd í leiðinni.

Svo hjóla ég framhjá þessari kirkju, þetta er eiginlega upp í sveit.

Presturinn á greinilega marga hesta.
Hérna er ég kominn í skólann, held að þeir geymi þessa rakettu fram að áramótunum.

Meira síðar, bestu kveðjur heim á klakann.

2007-09-23T12:51:00.000+02:00

Kominn aftur út
Nú er ég kominn aftur út til Álaborgar, skólinn byrjaður og nóg að gera. Fór á grill hjá Íslendingafélaginu í gær, hitti nýja íslendinga, fékk gott að borða og skemmti mér vel.

meira síðar ...

2007-06-07T00:14:00.000+02:00

Fimm próf eftir

Var í munnlegu prófi í gær, sem ég náði. Þá eru heil fimm próf eftir þar til þessi önn er búin. Á morgun er skriflegt próf, og síðasta prófið, sem er aðalprófið, er 25. júní.

Nú er ég búinn að panta far heim. Ég lendi í Keflavík föstudaginn 29. júní kl. 14:05, að staðartíma.

2007-05-31T09:38:00.000+02:00

Karnival og próf

Þið hefðuð átt að vera hérna síðasta laugardag. Stærsta Karnival á Norðurlöndunum var haldið hérna í Álaborg, vel yfir 20. þús manns tóku þátt. Skrúðgangan byrjar víða um bæinn snemma um morguninn og sameinast í miðbænum um hádegisbil. Stemmningin var ótrúlega góð, frábært veður og allir voru að skemmta sér hið besta. En auminginn ég var með hálsbólgu og kvef og þurfti að skrifa skýrslu og varð þess vegna að horfa á frá hliðarlínunni. Ég tók mér þó smá frí og kíkti á herlegheitin og smellti af nokkrum myndum, þær eru að finna á picasa síðunni minni.

Nú er stutt í að prófin hefjist en það fyrsta byrjar 5 júní, en svo er ég ekki búinn fyrr en 25. en þá er vörnin fyrir verkefnið. Við kláruðum loksins skýrsluna í gær og skáluðum í kampvíni í tilefni dagsins. En þá er bara að byrja að lesa.

Svo átti Hrafnhildur Ýr afmæli í gær. Til Hamingju með það Hrafnhildur mín, og kærar kveðjur heim.

2007-05-10T11:38:00.000+02:00

Kíkið á myndasíðuna

Ég var að setja tengla inn á myndasíðuna mína, til fólks sem einnig er hér í Álaborg. Þá er hægt að sjá hversu friðsælt og rólegt líf stúdenta er hér í bæ, helgast af bóklestri og heilbrigðri afþreyingu, myndasíðan er hér.

Í commenti minnist einhver á hval, það líst mér vel á, verður hann heimaslátraður?

með kveðju

Kiddi

2007-04-24T21:48:00.000+02:00

Eitthvað bank í ofnunum

Annars allt fínt að frétta, er á fullu að vinna í verkefninu. Fréttum það um daginn að bylgjudrekinn okkar hafi rekið á land og engir peningar til að koma honum á flot á ný. En verkefnið heldur áfram fyrir því. Er að reyna að planleggja sumarið, redda mér verkefni á Íslandi í sumar.

2007-04-15T22:28:00.000+02:00

Í sól og Sumaryl

Síðasta mánudag kom ég heim úr ferðalaginu. Ferðin var frábær, ég veit ekki hvað margar hallir, kirkjur og sýnagógur við sáum. Kraká og Prag eru alveg ótrúlega fallegar borgir og mjög gaman að vera þar, þó reyndar er Prag kjaftfull af túristum alls staðar. Við byrjuðum ferðina á Varsjá og staðirnir þar sem við heimsóttum voru mjög fallegir þó borgin sjálf sé ekkert svo sérstök. Fyrsti staðurinn sem við heimsóttum þar var Menningarhöllin sem er hæsta bygging í Póllandi og var gjöf frá Stalín til Pólsku þjóðarinnar. Svo heimsóttum við gamla bæinn og konungshallirnar, en kóngarnir þar voru afar glysgjarnir og byggingaglaðir. Einn flottasti staðurinn þar sem við sáum var safn um uppreisnina í Varsjá gegn þjóðverjum, ótrúlega flottar útstillngar, maður einhvern veginn sogast inn í stemmninguna.

á mánudeginum þann 2. apríl lögðum við að stað til Krakár, þangað hef ég komið áður og varð jafn hrifinn af þeirri borg nú og þá. þó virtist vera meira um túrista nú en síðast, enda ekki skrítið því þetta er fyrrum höfuðborg Póllands og mikið um merka staði. Við fórum morgunin eftir að heimsækja Auswich.

eftir að hafa verið í Kraká í tvo daga tókum við næturlest til Prag. Sú borg er mjög flott og hægt að eyða mánuði í að skoða hana alla, við sáum þó það allra merkilegsta.

Siðan var stoppað stutt í Dresden þar sem við fengum leiðsögn frá Cathleen sem var hérna í Álaborg í fyrra, en býr í Dresden. Á nokkrum klukkutímum fengum við séð það merkilegasta þar og stóð hún sig mjög vel enda lærð í ferðamálafræðum.

Berlín var síðasta stoppið og vorum við orðin afar þreytt eftir ferðina. Þar náðum við þó að fara til Potsdam og skoða garðinn keisarans, þar hafði hann byggt nokkur stykki hallir fyrir partístand. Við skoðuðum líka Brandenborgarhliðið og Reichstag, og gengum niður Unter den Linden.

Og nú viku seinna eftir að hafa komið heim er komið algert sumarveður og í kvöld grilluðum við svín og banana með súkkulaði, í góðra vina hópi. semsagt allt fínt að frétta, er þessa dagana að reyna að finna út verkefni fyrir sumarið.

Hér eru myndir af ferðalaginu, og líka ferðinni til Noregs sem ég fór í mars.

2007-03-24T18:19:00.000+01:00

Noregsferð

Þá er ég kominn heim úr Skíðaferðinni. Við fórum á skíði í Bortehlid í Noregi, var ekkert rosalega mikill snjór og bara ein lyftan opin en það var samt mjög gaman að prófa að skíða aftur hef ekki gert það í há herrans tíð.
Svo fórum við í skoðunarferð um Mandal og fórum til Lindesnes sem er syðsti punktur á fastalandinu. Þar var heilmikið rok, en samt gaman að skoða. Þar er viti og kletturinn sem vitinn stendur á er sundurgrafinn eftir þjóðverjana síðan í stríðinu.

Siglingin aftur til Danmerkur tók heilmikinn tíma, vegna slæms veðurs. Í staðinn fyrir að sigla til Hirthshals þá þurftum við að fara til Frederikshavn. Þegar þangað var komið þurftum við að bíða til miðnættis eftir að veður lægði svo við gætum siglt til hafnar. Veðrið var ekki það slæmt og við fundum ekki fyrir miklum hreyfingum í ferjunni. Þessi sigling tók um 13 tíma í stað 5!

Þá er bara að búa sig til næstu ferðar. þá er stefnan tekinn á Varsjá næsta föstudag.

2007-03-07T18:48:00.000+01:00

Reise Reise

Þetta er helst í fréttum:

Nú stendur til að minn leggist í ferðalög, og er stefnan fyrst sett austur á bóginn. Þann 30. mars flýg ég til Varsjár og eyði þar einum eða tveim dögum, svo tek ég lest suður til Krákár, þar sem ég gisti eina nótt. Þaðan til Prag og svo til Dresden og Berlínar áður en ég held heim sunnudaginn 7. apríl. Þetta stefnir í að vera spennandi ferð, ég fer með einum félaga mínum frá Spáníá og svo slást tvær stelpur í hópinn í Varsjá, og vonandi fleiri.

Þetta er ekki allt því um daginn kom upp sú hugmynd að skreppa til Noregs eina helgi og reyna skíðabrekkurnar þar. Ég hef ekki stigið á skíði í háa herrans tíð, vonandi verð ég ekki á rassinum allan tímann.

Ég hef aldrei hjólað eins mikið síðan ég flutti hingað til Danmerkur.

2007-01-26T15:23:00.000+01:00

Nýflutti Nonni

Nú er ég fluttur og nýja íbúðin er heilir 36,70 fermetrar brúttó og líst bara þokkalega vel á staðinn. Á laugardaginn var Tour de Chambres sem er svipað og Tour de Skerjó nema hver og einn er með þema í sínu verelsi. Ég sagði einum útlendingnum að við værum með svipað dót heima, nema við hefðum ekkert þema, "we just drink".
Við vorum 10 sem tókum þátt og voru nokkur skemmtileg þemu í gangi. Einn var með suðurjóskt kaffihlaðborð, annar var morfar og bauð upp á kökur og rommtoddý. Í einu herberginu horfðum við á dani tapa fyrir ungverjum og í öðru herbergi var gestgjafinn klædd einsog hjúkrunarkona. Svo var ammælisþema þar sem við drukkum jagermeister í hindberjagosi og jamesbondþema, shaken not stirred. Ég hinsvegar var í lopapeysu og bauð uppá brennivín sem ég hafði keypt í fríhöfninni ef ske kynni að ég skyldi fá gesti í heimsókn. Þetta var allt saman mjög skemmtilegt.
Nú er ég bara að slæpast, hef verið að ganga frá gömlu íbúðinni í byrjun vikunnar og svo hefur hjólið verið að gefast upp á mér, en það er í viðgerð í þessum töluðum. Svo er partý í kvöld, voða gaman. Það er virkilega erfitt að vera í fríi og vera illa skipulagður. Einn dagur getur farið í að skila pappírssnepli á skrifstofu útí bæ, með tilheyrandi hangsi.

Hvað finnst ykkur um að skrifa útí og einsog í einu orði, er það ljót íslenska?

2007-01-14T22:05:00.000+01:00

Bara tvö eftir

Nú fer ég að vera búinn í þessum prófum, ákaflega verður gaman þá, gaman þá. Líkindafræði á morgun og stýritækni á miðvikudaginn. Eftir það allt saman þarf ég að standa í smá flutningum inn í nýju íbúðina mína. Fór að sækja lyklana hjá húsverðinum og leist bara ansi vel á. Nýja kollegíið er að Bakkagarðsvegi 28 hús B íbúð 12 ef einhver vill kíkja í kaffi og meððí. Þegar það er allt yfirstaðið þá þarf ég að finna mér eitthvað til að drepa tímann þangað til skólinn byrjar aftur kannski ég fari í smá ferðalag, skoði mig eitthað um. Jæja aftur að námsbókunum, þangað til seinna.

2006-11-17T11:40:00.000+01:00

Heim um jólin

Nú lítur allt út fyrir að ég komi heim yfir hátíðirnar. Ég á pantað flug frá Kaupmannhöfn 19. desember og aftur til Danmerkur þann 30. Eftir það tekur við prófatörnin sem endar 17. janúar.

Ég var að sjá sýnishorn úr Mýrinni og ég verð að segja að ég er soldið spenntur yfir að sjá hana.

2006-10-21T20:56:00.000+02:00

Noregsferð

Eins og áður hefur komið fram var ég í Noregi á síðustu helgi og tókst ferðin með eindæmum vel. Við lögðum af stað um ellefuleytið á Freysdag frá skólanum tókum lest til Hirthshals og þar stigum við um borð í ferjuna Christian IV, ferjan var yfirfull af fólki á leiðinni heim úr haustfríi. við komum til Kristiansand um fimmleytið og á leiðarenda um klukkan sex. Ég gisti hjá Tengdaforeldrum Rúnars, sem er hópfélagi minn hér í skólanum. En þau búa í sveit rétt hjá Mandal sem er syðsta borgin í Noregi. Á laugardaginn fórum við að skoða Mandal sem er kölluð hvíta borgin, af þeirri ástæðu að nær öll húsin þar eru máluð hvít, þetta er ansi fallegur bær flottur gamall miðbær og bryggjan er full af bátum því hver einasta fjölskylda á bát. Undan ströndinni er fullt af litlum eyjum þar sem heimamenn eiga margir hverjir sumarbústað og eyða margir heilu sumrunum þar. Við fórum svo í smá siglingu í litlum gömlum bát smíðum þarna í Mandal.

Um kvöldið fórum við svo í mat til systur hans Rúnars og fengum góðan mat norskan mat. Þar var svo ákveðið að fara á rádýraveiðar daginn eftir. Við lögðum af stað um áttaleytið inn í skóginn og þar var hundinum sleppt lausum. Hundurinn fann slóð og náði að elta tvö dýr. Veiðimennirnir stilltu sér upp og biðu eftir dýrunum. Við heyrðum í hundinum koma og stuttu síðar sáum við tvö dýr skjótast stutt frá okkur en þau voru of snögg svo Rúnar náði ekki færi, en þetta var ansi spennandi ferð og skemmtilegt að fara inn í skóginn. Eftir veiðina kveiktum við eld og grilluðum pulsur.

Um kvöldið fékk ég svo að smakka á Elgskjöti, en það er afar bragðmikið kjöt. Morgunin eftir fórum við í smá ferð til Kristiansand og skoðuðum okkur um.

Við fórum svo heim á Týsdag með ferjunni og vorum komnir heim um fjögurleytið ánægðir með góða ferð.

Á morgun er svo sett stefnan á stutta hjólaferð eitthvað út fyrir borgina, meira um það síðar. Góðar stundir.

2006-10-13T00:28:00.000+02:00

Noregsferð

Um hádegisbilið á morgun verð ég kominn í langt helgarfrí, við fáum nefnilega frí á mánudag og týsdag. Ég var eitthvað að vandræðast með hvað ég ætti að gera í fríinu en það leystist þegar hópfélagi minn stakk upp á því að ég færi með honum til Noregs. Hann er frá Mandal sem er rétt hjá Kristiansand, þannig að þetta verður stutt ferð yfir sundið. Nú er bara að klára að pakka saman og hlakka til ferðarinnar.

2006-10-06T16:17:00.000+02:00

Játningar

Kæru vinir ég þarf að gera játningu. Ég hef verið hér í danmörku í rúman mánuð og ekki hagað mér eins og íslendingi sæmir. Ég var fyrst núna að kaupa fyrsta kassann af bjór. Ég veit að sum ykkar geta ekki orða bundist yfir þessu en ég mun gera bragarbót á þessu og lofa að eiga nóg í ískápnum ef eitthvert ykkar skyldi kíkja í heimsókn. Og bráðum kemur betri tíð, með bjór í maga eins og skáldið sagði.

Kassinn kostaði krónur 127 og 50 aura danska, innifalið í því er skilagjald krónur 42 og 50, þannig að í heildina kostar bjórinn 85 krónur sem í íslenskum er 986,94 krónur íslenskar sem gerir 33 krónur íslenskar fyrir stykkið!

Á morgun er ég að fara í hjólaferð eitthvert út úr borginni, það er spáð rigningu þannig að áðan keypti ég mér regnjakka, svo að það ætti ekki að væsa um kallinn.

2006-09-24T11:10:00.000+02:00

Færsla númer tvö.

Ég þarf að fara að venja mig á að skrifa inn á þetta blogg, þýðir ekki að láta fólk reka á eftir sér. Nú eru liðnir rúmir tuttugu dagar síðan ég skrifaði síðast þannig að það er bara best að byrja þar sem ég endaði síðast.
Dvöl mín hér í Álaborg byrjaði ekki vel. Helgina sem skólinn byrjaði var ég að hjálpa Didda frænda mínum að setja upp tól og tæki fyrir barnahátíð hér í bæ, Sjov i Parken. Sem gekk með ágætum þar til við fórum að taka saman hoppukastalana og tjöldin, þá réðust á okkur í hópum einhvers konar moskítóflugur, sem Danir kalla Mygt. Dagana eftir þessa árás þá leit allt út fyrir að ég mundi enda með því að ég myndi breytast í einhvers konar fílamann, en það varð sem betur fer ekki og er ég búinn að ná mér að fullu.

Ég bý á Kollegí í vesturbæ Álaborgar, c.a. 1km frá miðbænum (Ny Kastetsvej 16E, ef einhver ætlar að kíkja í kaffi). Nágrannar mínir hér á kollegíinu koma allsstaðar að úr heiminum, Þýskalandi, Mexíkó, Kanada, USA, Frakklandi og Tælandi svo eitthvað sé nefnt. Það er afskaplega góður andi í húsinu, við erum búin að halda nokkur partí og er hópurinn búinn að blandast ansi vel.

Um daginn fór ég á tónleika með hinni þokkafullu Eivoru, og var það mögnuð kvöldstund, Álaborg er mikið menníngarpláss og nóg að gera að sækja hina og þessa tónleikana ef maður er þannig stemmdur.

Annars er ég bara búinn að vera uppí skóla og læra, stundaskráin er ansi stíf fyrstu vikurnar en svo tekur verkefnið smám saman við. Skólinn hérna er byggður upp á hópavinnu og fær hver hópur verkefnir sem tekur alla önnina að leysa. Hópurinn minn samanstendur aðeins af mér og einum nojara og er ég nokkuð sáttur við þá skipan. Verkefnið sem við fengum snýst um að búa til stýringu á krana þannig að kraninn sveiflist sem minnst þegar hann leggur af stað og þegar hann stoppar, en krani þessi er svipaður af gerð og notaður er í höfnum landsins, bara
töluvert minni.

jæja vonandi þurfiði ekki að bíða lengi eftir næstu færslu, en þangað til eigið góðan dag.

2006-08-30T17:06:00.000+02:00

Nú er ég loksins kominn til Álaborgar og búinn að koma mér fyrir í íbúðinni. Flugið gekk ljómandi vel og síðustu daga hef ég verið í góðu yfirlæti hjá Didda og Helle. Diddi er búinn að sýna mér bæinn og koma mér inn í kerfið. Ég er búinn að prófa almenningsvagnana hér og komst að því að ég þarf bara að taka einn vagn beint í skólann sem er geggjað.
En nú er ég bara að bíða eftir að skólinn byrji á föstudaginn, þá þarf ég að ræsa mig upp fyrir allar aldir og vera mættur klukkan átta fyrir utan stúdentamiðstöðina og borða morgunmat með verðandi samnemendum mínum.